KONFERENZA STAMPA

Christine Lagarde, President tal-BĊE,
Luis de Guindos, Viċi-President tal-BĊE

Frankfurt am Main, 6 ta’ Marzu 2024

Il-wara nofsinhar it-tajjeb, il-Viċi-President u jien nilqgħukom għal din il-konferenza stampa.

Il-Kunsill Governattiv illum iddeċieda li jnaqqas it-tliet rati ewlenin tal-imgħax tal-BĊE b’25 punt bażi. B’mod partikolari, id-deċiżjoni li titnaqqas ir-rata tal-faċilità tad-depożitu – ir-rata li permezz tagħha nidderieġu l-pożizzjoni tal-politika monetarja – hija bbażata fuq il-valutazzjoni aġġornata tagħna tal-prospettiva tal-inflazzjoni, id-dinamika tal-inflazzjoni sottostanti u s-saħħa tat-trażmissjoni tal-politika monetarja.

Il-proċess ta’ disinflazzjoni miexi sew kif ippjanat. L-inflazzjoni kompliet tiżviluppa b’mod wiesgħa hekk kif kien qed jistenna l-persunal, u l-aktar tbassir reċenti jallinja mill-qrib mat-tbassir preċedenti tal-inflazzjoni. Il-persunal issa jbassar inflazzjoni medja ta’ 2.3 fil-mija fl-2025, 1.9 fil-mija fl-2026 u 2.0 fil-mija fl-2027. Ir-reviżjoni ’l fuq fl-inflazzjoni komplessiva għall-2025 tirrifletti dinamiċi tal-prezzijiet tal-enerġija aktar b’saħħithom. Għall-inflazzjoni bl-esklużjoni tal-enerġija u l-ikel, il-persunal ibassar medja ta’ 2.2 fil-mija fl-2025, 2.0 fil-mija fl-2026 u 1.9 fil-mija fl-2027.

Il-biċċa l-kbira tal-miżuri tal-inflazzjoni sottostanti jissuġġerixxu li l-inflazzjoni se tistabbilizza ruħha għal madwar il-mira tagħna ta’ 2 fil-mija fuq perjodu ta’ żmien medju fuq bażi sostnuta. L-inflazzjoni domestika tibqa’ għolja, l-aktar minħabba li l-pagi u l-prezzijiet f’ċerti setturi għadhom qed jaġġustaw ruħhom għaż-żieda f’daqqa fil-passat fl-inflazzjoni b’dewmien sostanzjali. Madankollu, iż-żieda fil-pagi qiegħda timmodera kif mistenni, u l-profitti qegħdin itaffu parzjalment l-impatt fuq l-inflazzjoni.

Il-politika monetarja tagħna qiegħda ssir ferm inqas restrittiva, hekk kif it-tnaqqis fir-rata tal-imgħax tagħna qiegħed jagħmel it-teħid b’self ġdid inqas għali għad-ditti u għall-unitajiet domestiċi u t-tkabbir tas-self qed jiżdied. Fl-istess ħin, xprunatura lejn il-faċilitar tal-kundizzjonijiet tal-finanzjament ġejja minn żidiet fir-rata tal-imgħax tal-passat li għadhom qed jittrasmettu għall-istokk tal-kreditu, u s-self jibqa’ mrażżan b’mod ġenerali. L-ekonomija tiffaċċja sfidi kontinwi u l-persunal, mill-ġdid niżżel it-tbassir tiegħu tat-tkabbir - għal 0.9 fil-mija għall-2025, 1.2 fil-mija għall-2026 u 1.3 fil-mija għall-2027. Ir-reviżjonijiet ’l isfel għall-2025 u għall-2026 jirriflettu esportazzjonijiet aktar baxxi u dgħjufijiet kontinwi fl-investiment, li parzjalment joriġinaw minn inċertezza kbira fil-politika kummerċjali kif ukoll minn inċertezza fil-politika usa’. Dħul reali li qed jiżdied u l-effetti li gradwalment qegħdin jgħibu taż-żidiet tal-passat tagħna fir-rati jibqgħu xprunaturi ewlenin li jirfdu l-irkupru mistenni fid-domanda maż-żmien.

Aħna ddeterminati li niżguraw li l-inflazzjoni tistabbilizza b’mod sostenibbli fil-mira tagħna ta’ 2 % fuq perjodu ta’ żmien medju. B’mod speċjali fil-kundizzjonijiet attwali ta’ inċertezza li qed tiżdied, se nsegwu approċċ ibbażat fuq id-data u laqgħa b’laqgħa sabiex niddeterminaw il-pożizzjoni tal-politika monetarja xierqa. B’mod partikolari, id-deċiżjonijiet tagħna dwar ir-rati tal-imgħax se jkunu bbażati fuq il-valutazzjoni tagħna tal-prospettiva tal-inflazzjoni fid-dawl tad-data ekonomika u finanzjarja li tidħol, id-dinamiċi tal-inflazzjoni sottostanti, u s-saħħa tat-trażmissjoni tal-politika monetarja. M’aħniex qegħdin nimpenjaw ruħna minn qabel għal xi direzzjoni partikolari għar-rati.

Id-deċiżjonijiet meħuda llum huma spjegati fi stqarrija għall-istampa disponibbli fis-sit web tagħna.

Issa se niddeskrivi f’aktar dettall kif naraw li se jiżviluppaw l-ekonomija u l-inflazzjoni, u mbagħad se nispjega l-valutazzjoni tagħna tal-kundizzjonijiet finanzjarji u monetarji.

Attività ekonomika

L-ekonomija taż-żona tal-euro aktarx li kibret b’mod modest fl-aħħar trimestru tal-2024. L-ewwel xahrejn tal-2025 raw kontinwazzjoni ta’ ħafna mit-tendenzi tas-sena li għaddiet. Il-manifattura għadha żżomm it-tkabbir lura anki jekk l-indikaturi tal-istħarriġ qegħdin juru titjib. L-inċertezza kbira, kemm domestikament kif ukoll lil hinn, qiegħda żżomm lura l-investiment u l-isfidi għall-kompetittività qegħdin jinħassu fuq l-esportazzjonijiet. Fl-istess ħin, is-servizzi għadhom reżiljenti. Barra minn hekk, dħul tal-unitajiet domestiċi li qed jiżdied u s-suq tax-xogħol robust qegħdin jappoġġaw irkupru gradwali fil-konsum, għalkemm il-fiduċja tal-konsumaturi għadha fraġli u r-rati tat-tfaddil għadhom għoljin.

Ir-rata tal-qgħad baqgħet fl-iktar punt storikament baxx tagħha ta’ 6.2 fil-mija f’Jannar, u huwa stmat li l-impjiegi żdiedu b’0.1 fil-mija fl-aħħar trimestru tal-2024. Madankollu, id-domanda għall-ħaddiema mmoderat, u data minn stħarriġ reċenti ssuġġeriet li ż-żieda fl-impjiegi ttaffiet fl-ewwel xahrejn tal-2025.

L-inċertezza żdiedet u hija mistennija li jkollha impatt akbar milli mistenni preċedentament fuq l-investiment u l-esportazzjonijiet. Iżda t-tkabbir għandu jiġi appoġġat minn dħul ogħla u minn kostijiet tas-self aktar baxxi. Skont it-tbassir tal-persunal, l-esportazzjonijiet għandhom ikunu appoġġati wkoll minn domanda globali li qed tiżdied diment li t-tensjonijiet kummerċjali ma jkomplux jeskalaw.

Il-politiki fiskali u strutturali għandhom jagħmlu l-ekonomija aktar produttiva, kompetittiva u reżiljenti. Il-Kumpass tal-Kompetittività tal-Kummissjoni Ewropea jipprovdi direzzjoni konkreta għal azzjoni u l-proposti tiegħu għandhom jiġu adottati malajr. Il-gvernijiet għandhom jiżguraw finanzi pubbliċi sostenibbli f’konformità mal-qafas ta’ governanza ekonomika tal-UE u għandhom jipprijoritizzaw ir-riformi strutturali essenzjali li jżidu t-tkabbir u l-investiment strateġiku.

Inflazzjoni

L-inflazzjoni annwali kienet 2.4 fil-mija fi Frar wara 2.5 fil-mija f’Jannar u 2.4 fil-mija f’Diċembru, skont l-istima flash tal-Eurostat. L-inflazzjoni fil-prezz tal-enerġija naqset għal 0.2 fil-mija, wara żieda b’saħħitha ta’ 1.9 fil-mija f’Jannar, minn 0.1 fil-mija f’Diċembru. B’kuntrast, l-inflazzjoni tal-prezz tal-ikel żdiedet għal 2.7 fil-mija minn 2.3 fil-mija f’Jannar u 2.6 fil-mija f’Diċembru. L-inflazzjoni fuq l-oġġetti żdiedet għal 0.6 fil-mija, filwaqt li l-inflazzjoni fis-servizzi naqset għal 3.7 fil-mija, minn 3.9 fil-mija f’Jannar u 4.0 fil-mija f’Diċembru.

Ħafna mill-indikaturi tal-inflazzjoni bażi qegħdin jindikaw lejn ritorn sostnut tal-inflazzjoni għall-mira fuq żmien medju tagħna ta’ tnejn fil-mija. L-inflazzjoni domestika, li ssegwi mill-qrib l-inflazzjoni fis-servizzi, naqset kemmxejn f’Jannar. Madankollu, tibqa’ għolja, hekk kif il-pagi u xi prezzijiet ta’ servizzi għadhom qed jaġġustaw ruħhom għaż-żieda fl-inflazzjoni tal-passat b’dewmien sostanzjali. Bl-istess mod, in-negozjati reċenti dwar il-pagi jippuntaw lejn moderazzjoni kontinwata fil-pressjonijiet tal-kostijiet tal-manodopera.

Is-suppożizzjoni ta’ inflazzjoni ogħla fil-prezzijiet tal-enerġija wasslet lill-persunal biex jirrevedi ‘l fuq it-tbassir dwar l-inflazzjoni komplessiva għall-2025. Fl-istess ħin, il-persunal jistenna li l-inflazzjoni ewlenija tkompli tonqos, hekk kif il-pressjonijiet tal-kost tal-manodopera se jkomplu jonqsu u l-issikkar tal-politika monetarja tal-passat se jkompli jkollu effett fuq il-prezzijiet. Il-biċċa l-kbira tal-miżuri ta’ aspettattivi tal-inflazzjoni fuq żmien itwal għadhom jinsabu madwar it-2 fil-mija. Dawn il-fatturi kollha sejrin jappoġġaw ir-ritorn sostenibbli tal-inflazzjoni għall-mira tagħna.

Valutazzjoni tar-riskji

Ir-riskji għat-tkabbir ekonomiku jibqgħu mxaqilba lejn it-tnaqqis. Eskalazzjoni fit-tensjonijiet kummerċjali tnaqqas it-tkabbir fi-żona tal-euro billi tnaqqas l-esportazzjonijiet u ddgħajjef l-ekonomija globali. Inċertezza li għadha għaddejja dwar il-politiki kummerċjali globali tista’ tiġbed ’l isfel l-investiment. Tensjonijiet ġeopolitiċi, bħall-gwerra mhux ġustifikata tar-Russja kontra l-Ukrajna u l-kunflitt traġiku fil-Lvant Nofsani, jibqgħu wkoll sorsi ewlenin ta’ inċertezza. It-tkabbir jista’ jkun aktar baxx jekk l-effetti mdewma tal-issikkar tal-politika monetarja jdumu aktar milli mistenni. Fl-istess ħin, it-tkabbir jista’ jkun ogħla jekk il-kundizzjonijiet ta’ finanzjament aktar laxki u t-tnaqqis fl-inflazzjoni jippermettu li l-konsum domestiku u l-investiment jirkupraw aktar malajr. Żieda fin-nefqa fuq id-difiża u fuq l-infrastruttura tista’ żżid ukoll it-tkabbir.

Il-frizzjoni li qed tiżdied fil-kummerċ globali qiegħda żżid aktar inċertezza għall-perspettiva għall-inflazzjoni taż-żona tal-euro. Eskalazzjoni ġenerali fit-tensjonijiet kummerċjali jistgħu jaraw l-euro taqa’ u l-kostijiet tal-importazzjonijiet jiżdiedu, u dan iżid il-pressjoni biex togħla l-inflazzjoni. Fl-istess ħin, domanda aktar baxxa għall-esportazzjoni fiż-żona tal-euro bħala riżultat ta’ tariffi ogħla u ridirezzjonar ta’ esportazzjonijiet fiż-żona tal-euro minn pajjiżi b’kapaċità eċċessiva jpoġġu pressjoni biex titbaxxa l-inflazzjoni. Tensjonijiet ġepolitiċi joħolqu riskji għall-inflazzjoni fuq żewġ naħat fir-rigward tas-swieq tal-enerġija, fiduċja tal-konsumaturi u investiment tan-negozji. Avvenimenti ta’ temp estrem, u l-kriżi klimatika li qiegħda tiżvolġi b’mod aktar estiż, jistgħu jgħollu l-prezzijiet tal-ikel aktar milli huwa mistenni. L-inflazzjoni tista’ tkun ogħla jekk il-pagi jew il-profitti jiżdiedu b’aktar milli huwa mistenni. Żieda fin-nefqa fuq id-difiża u l-infrastruttura tista’ żżid ukoll l-inflazzjoni permezz tal-effett tagħha fuq id-domanda aggregata. Iżda l-inflazzjoni tista’ tissorprendi ’l isfel jekk il-politika monetarja ttaffi d-domanda b’aktar milli huwa mistenni.

Kundizzjonijiet finanzjarji u monetarji

Ir-rati tal-imgħax tas-suq fiż-żona tal-euro naqsu wara l-laqgħa ta’ Jannar tagħna, iżda żdiedu matul dawn l-aħħar jiem b’rispons għal prospettiva riveduta għall-politika fiskali. It-tnaqqis fir-rata tal-imgħax tagħna qiegħed gradwalment jagħmilha inqas għalja għad-ditti u għall-unitajiet domestiċi li jisselfu u t-tkabbir tas-self qed jaqbad. Fl-istess ħin, xprunatura lejn il-faċilitar tal-kundizzjonijiet tal-finanzjament ġejja minn żidiet fir-rata tal-imgħax fil-passat li għadhom jittrasmettu għall-istokk tal-kreditu, u s-self jibqa’ b’mod ġenerali mrażżan.

Ir-rata tal-imgħax medja fuq is-self ġdid għad-ditti naqset xi ftit għal 4.2 fil-mija f’Jannar, minn 4.4 fil-mija f’Diċembru. B’kuntrast, il-kost tad-ditti għall-ħruġ ta’ dejn ibbażat fuq is-suq tela’ għal 3.7 fil-mija, 0.2 punti perċentwali ogħla mil-livell ta’ Diċembru. Tul l-istess perjodu, ir-rata tal-imgħax medja fuq self ipotekat ġdid naqset għal 3.3 fil-mija, minn 3.4 fil-mija.

It-tkabbir fis-self bankarju lil ditti żdied għal 2.0 fil-mija f’Jannar, ogħla minn 1.7 fil-mija f’Diċembru, wara fluss fix-xahar moderat ta’ self ġdid. It-tkabbir fit-titoli ta’ dejn maħruġin minn ditti żdied għal 3.4 fil-mija f’termini annwali. Is-self ipotekarju kompla jiżdied gradwalment iżda baqa’ mtaffi b’mod ġenerali, b’rata ta’ tkabbir annwali ta’ 1.3 fil-mija.

Konklużjoni

Il-Kunsill Governattiv illum iddeċieda li jnaqqas it-tliet rati ewlenin tal-imgħax tal-BĊE b’25 punt bażi. B’mod partikolari, id-deċiżjoni li titnaqqas ir-rata tal-faċilità tad-depożitu – ir-rata li permezz tagħha nidderieġu l-pożizzjoni tal-politika monetarja – hija bbażata fuq il-valutazzjoni aġġornata tagħna tal-prospettiva tal-inflazzjoni, id-dinamika tal-inflazzjoni sottostanti u s-saħħa tat-trażmissjoni tal-politika monetarja. Aħna ddeterminati li niżguraw li l-inflazzjoni tistabbilizza b’mod sostenibbli fil-mira tagħna ta’ 2 % fuq perjodu ta’ żmien medju. B’mod speċjali fil-kundizzjonijiet attwali ta’ inċertezza li qed tiżdied, se nsegwu approċċ ibbażat fuq id-data u laqgħa b’laqgħa sabiex niddeterminaw il-pożizzjoni tal-politika monetarja xierqa. B’mod partikolari, id-deċiżjonijiet tagħna dwar ir-rati tal-imgħax se jkunu bbażati fuq il-valutazzjoni tagħna tal-prospettiva tal-inflazzjoni fid-dawl tad-data ekonomika u finanzjarja li tidħol, id-dinamiċi tal-inflazzjoni sottostanti, u s-saħħa tat-trażmissjoni tal-politika monetarja. M’aħniex qegħdin nimpenjaw ruħna minn qabel għal xi direzzjoni partikolari għar-rati.

Fi kwalunkwe każ, aħna lesti li naġġustaw l-istrumenti kollha tagħna fi ħdan il-mandat tagħna biex niżguraw li l-inflazzjoni terġa’ lura għall-mira tagħna għal żmien medju u li nippreżervaw il-funzjonament bla xkiel tat-trażmissjoni tal-politika monetarja.

Issa ninsabu lesti biex inwieġbu l-mistoqsijiet tagħkom.

Għall-kliem eżatt miftiehem mill-Kunsill Governattiv, jekk jogħġbok ara l-verżjoni bl-Ingliż.